Далас Маверикс и Филаделфија 76ерс израмнија на 2:2 во партии во конференциските полуфиналиња на НБА плеј-офот против Феникс Санс и Мајами Хитс, соодветно.
Далас со одлична игра на почетокот на натпреварот успеа да ги разбие Санс, кои до крајот не можеа да се соземат и да ја достигнат предноста на расположените домаќини.
Најдобар во победничкиот тим беше Лука Дончиќ со 26 поени и 11 асистенции, додека Дориан Фини-Смит додаде 24 поени. Девин Букер постигна 35 поени за Санс.
Вреди да се напомене дека гостинскиот играч Крис Пол доживеа стрес поради случувањата на трибините кои завршија со исфрлање на двајца навивачи. Имено, момчето и неговата (најверојатно) мајка биле спроведени надвор од салата поради наводен инцидент со семејството на Пол.
Според американските медиуми, некој ги ставил рацете врз мајката на Пол и ја оттурнал неговата сопруга. Меѓутоа, на видеото се гледа само како обезбедувачот го известува младиот човек во маица на Дончиќ дека мора да ја напушти салата, по што тој заминува во друштво на жена, додека Пол му викал дека ќе се видат подоцна.
На вториот натпревар ноќеска на Мајами не му помогнаа ниту одличните 40 поени на Џими Батлер бидејќи загуби со 116:108. Домашниот тим до победата го предводеа Џејмс Харден со 31 поен и Жоел Ембиид со 24 поени и 11 скока.
Исток
Филаделфија 76ерс - Мајами Хит 116:108 (2:2 во партии)
Запад
Далас Маверикс - Феникс Санс 111:101 (2:2 во партии)
