„Кафето содржи антиоксиданси и биоактивни соединенија кои можат да бидат одговорни за ефектот на намалување на крвниот притисок“, велат експертите.
Една нова студија објавена во списанието Nutrients покажува дека пиењето три или повеќе шолји кафе дневно е поврзано со понизок крвен притисок.
Авторите забележуваат во нивниот извештај дека сè уште се дебатира за ефектите на кафето врз крвниот притисок, првенствено затоа што е познато дека содржината на кофеин во кафето го зголемува крвниот притисок на краток рок.
Сепак, овие ефекти може да се ублажат со антиоксидансите кои се наоѓаат во кафето, кои можат да помогнат во проширување на крвните садови и заштита на клетките од слободните радикали.
Главниот автор на студијата, д-р Ариго Ф.Г. Цицеро, вонреден професор на Катедрата за медицински и хируршки науки на Универзитетот во Болоња, и неговиот тим сакале да истражат како интеракцијата помеѓу кофеинот и другите соединенија пронајдени во кафето ќе влијае на појавата на крвниот притисок.
За да ја спроведе својата студија, тимот на Цицеро анкетираше примерок од 720 мажи и 783 жени.
Инаку, оваа студија наречена Brisighella Heart Study, првпат започна во 1972 година, а сè уште е во тек, а опфаќа случаен примерок во истоимениот рурален град во северна Италија.
Истражувачите го разгледале крвниот притисок и навиките за пиење кафе на учесниците, како и други податоци релевантни за кардиоваскуларното здравје.
Откако ги анализирале податоците, откриле дека консумацијата на кафе е поврзана со намален крвен притисок.
Исто така, Меган К. Роудс, д-р и постдокторски соработник на Одделот за нефрологија на Универзитетот во Алабама во Бирмингем, рече дека постојат неколку механизми со кои консумирањето кафе може да го намали крвниот притисок, од кои некои се докажани во студии на животни.
„Кафето содржи кофеин, кој може да го подигне и намали крвниот притисок во акутни ситуации, но содржи и антиоксиданси и биоактивни соединенија кои можат да бидат одговорни за ефектот на намалување на крвниот притисок“, објасни таа.
Д-р Дебабрата Мукерџи, претседател на Катедрата за интерна медицина и професор по интерна медицина во Texas Tech Health Sciences Center El Paso, објасни:
„Иако кофеинот може да го зголеми нивото на крвниот притисок (особено кај оние кои не пијат кафе), количината на други биоактивни соединенија во кафето го балансира овој ефект со финален неутрален до позитивен ефект врз крвниот притисок“.
Дали луѓето со висок крвен притисок треба да пијат кафе?
Д-р Џим Лиу, кардиолог од Медицинскиот центар Векснер на Државниот универзитет во Охајо, рече дека иако оваа студија е мала и фокусирана на одредена популација, нејзините наоди се во согласност со претходното знаење за тоа како кафето влијае на крвниот притисок.
„Кафето може акутно да го зголеми крвниот притисок по консумирањето, но всушност нема постојани докази кои покажуваат дека умереното конзумирање кафе води до долгорочни проблеми со висок крвен притисок или срцеви заболувања воопшто“, истакна тој.
„За хипертензивните пациенти кои консумираат умерено количество кафе, оваа студија дава уште поохрабрувачки податоци дека е во ред да се продолжи со пиење умерени количини кафе и дека тоа нема негативно да влијае на крвниот притисок. Ако ништо друго, умереното консумирање кафе може да помогне со крвниот притисок“, рече Лиу.
Мукерџи додаде дека и покрај наодите, пиењето кафе не се препорачува за луѓе со постоечка тешка хипертензија.
