Денес е тешко да се замисли животот без него, но дали знаете што всушност се крие зад оваа кратенка?
Живееме во свет на акроними и кратенки, особено во светот на технологијата - iOS, LiDAR, GPS... сето тоа се поими со кои се среќаваме речиси секојдневно.
Логично е дека зад овие акроними се кријат значајни фрази, на пр. GPS е „Глобален систем за позиционирање“ итн. Сепак, една кратенка особено се издвојува овде, и веројатно не значи што мислите - тоа е Wi-Fi.
Без разлика дали го пишувате со или без цртичка, Wi-Fi (или WiFi), веројатно би погодиле, значи нешто „безжично“, особено затоа што е вообичаено верување дека Wi-Fi е кратенка за „Wireless Fidelity“.
Сето тоа може да има смисла - освен што работите не се онакви какви што изгледаат.
Пред 19 години, односно во 2005 година, писателот и новинар Кори Доктороу на својот блог објави интервју со Фил Беланџер, еден од основачите на „Wi-Fi Alliance“, организација која одобрува Wi-Fi производи.
Беланџер тогаш откри дека Wi-Fi всушност значи - апсолутно ништо.
„Ни требаше нешто попривлечно од „IEEE 802.11b Direct Sequence“. Ангажиравме маркетинг агенција, тие дојдоа до десет акроними и го избравме овој. Слоганот ‘Стандард за Wireless Fidelity’ се појави подоцна“, рече Беланџер.
Тој откри и дека некои од неговите колеги биле „исплашени“ бидејќи не го разбирале името или целата приказна за маркетингот. Им требаше објаснување, па го смислија „Wireless Fidelity“ и така се роди „митот“.