Новиот филм на Кевин Спејси не успеа да привлече публика. Во првиот викенд од прикажувањето заработи 126 долари на киноблагајните.
Да, убаво прочитавте, не 126 илјади долари, туку 126 долари.
Премиерата на новиот филм на Спејси „Billionaire Boys Club“ ја плати цената на обвинувањата за сексуално вознемирување поднесени против актерот и со ова се чини се запечатува кариерата на една од најславните холивудски легенди.
Дебаклот се чини беше и неизбежен, со оглед на тоа дека Спејси беше отфрлен од холивудската заедница кога се појавија обвинувањата, иако филмот беше снимен пред скандалот.
„Се надеваме дека обвинувањата за однесувањето на еден актер, за кои не се знаеше додека се снимаше филмот, нема да му пречат на филмот. Меѓутоа, одлуката да го пуштиме филмот не беше лесна“, соопшти дистрибутерот.
„Billionaire Boys Club“ е сниман по вистинска приказна група момчиња кои во 80-тите основале клуб со една цел – набрзина да се збогатат со измами.
Спејси го игра Рон Левин, хомосексуалец кој бил убиен откако измамил многу луѓе. Телото никогаш не му било најдено и постои сомневање дека можеби уште е жив.
Филмот е во режија на Џејмс Кокс, а покрај Спејси, улогите ги играат Енсел Елгорт, Терон Еџертон, Ема Робертс, Суки Вотерхаус и други.
Спејси беше исфрлен од веќе снимениот филм „All The Money In The World“, а беше откажан и неговиот лик во популарната серија „House of Cards“ поради обвинувањата за сексуално вознемирување.