Иако беше најавен како историски, договорот за името изгледа нема да биде усвоен лесно ни во Македонија, ни во Грција. По протестите во Скопје, денеска има протести во Атина.
За време на денешниот протест пред грчкиот Парламент се случи помал инцидент во кој неколку учесници се обидоа да влезат во зградата на собранието каде е во тек расправата за гласање доверба на владата, токму поради договорот со Македонија.
Седницата беше закажана на барање на опозицијата поради договорот што пред неколку дена го постигнаа македонскиот и грчкиот премиер, Зоран Заев и Алексис Ципрас.
Полицијата успеа да ги спречи демонстрантите со моторџиски кациги на главите, во обидот да влезат во Парламентот.
Дел од демонстрантите останале на влезните скали, а други кај Споменикот на незнаен јунак поставен пред Собранието, мавтајќи со грчки знамиња.
Порталот „Катимерини“ објави дека демонстрантите извикуваат слогани во кои ја обвинуваат актуелната влада на Ципрас за предавничко однесување. Порталот додава дека бројот на учесници во протестите е далеку помал во споредба со оние што беа организирани претходно годинава со ист повод.
