Актерот Дени Мастерсон, на повторното судење во Лос Анџелес, беше прогласен за виновен за силување, и се соочува со затворска казна до 30 години.
Актерот, кој го глумеше Стивен Хајд во хит-серијата „That '70s Show“, беше прогласен за виновен по две точки од обвинението.
Поротата составена од седум жени и пет мажи ја донесе пресудата по седумдневно заседавање. Нему му се заканува затворска казна до 30 години, пишува The Guardian.
47-годишниот актер наводно ставал дрога во пијалаците на жените за да може да ги силува. Обвинителите изјавија дека тој силувал три жени, вклучително и долгогодишна девојка, во својот дом во Холивуд Хилс помеѓу 2001 и 2003 година.
Поротата не можеше да донесе пресуда за силувањето на неговата долгогодишна девојка, но го прогласи за виновен за силување на преостанатите две жени.
Обвинителите тврдеа дека Дени го користел своето влијание во Скиентолошката црква, каде што сите три жени биле членови во тоа време, за со децении да избегне последици.
Актерот не сведочеше, ниту неговите адвокати повикаа сведоци. Одбраната тврдеше дека делата биле консензуални и се обиде да ги дискредитира тврдењата на жените посочувајќи промени во исказите и недоследности.
Портпаролот на Мастерсон одби да даде коментар, но неговите адвокати речиси сигурно ќе поднесат жалба.
