Славната американска актерка Џенифер Анистон проговори за мајчинството и суровите озборувања за наводна бременост.
Призна дека во јавноста е претставена како личност која не сакала да се оствари како мајка, но сега актерката откри дека сите овие години се борела со неплодност и неуспешни обиди да забремени.
„Се обидував да останам бремена. Тоа беше голем предизвик за мене. Сите овие години, само различни шпекулации. Навистина беше многу тешко. Минував низ процеси на инвитро оплодување, пиев кинески чаеви. Го правев сето тоа“, објасни Анистон за магазинот Allure.
За суровите шпекулации придонесе и разводот со Бред Пит во 2005 година, кога многумина претпоставија дека двојката се раздели бидејќи Џенифер одбрала да гради кариера наместо семејство.
„Ми зборуваа дека сум била себична и дека се грижам единствено за кариерата и успехот. Зборуваа дека поради тоа не сум сакала дете, дека поради тоа маж ми ме оставил. Сме се разделиле бидејќи не сум сакала да му родам дете. Тоа апсолутно беа големи лаги“, објасни актерката.
Не откри кога точно минала низ процеси на инвитро оплодување, но спомена дека тоа било пред неколку години. Денес, кога има 53 години актерката е помирена со фактот дека нема да има деца.
„Еве ме денес, сега чувствувам олеснување бидејќи повеќе ги немам тие мисли можам ли да имам деца. Не морам веќе да размислувам за тоа. Во моите доцни триесетти и четириесетти години минував низ големи проблеми и да не беше тоа, никогаш немаше да станам тоа што треба да бидам“, изјави Анистон.
Потоа додаде:
„Би дала сè тогаш некој да ми кажеше да замрзнам јајце-клетки, самата ќе си направев услуга“, се присетува актерката која тврди дека денес се чувствува подобро од кога и да е.
Ова не е првпат актерката отворено да зборува за шпекулации и озборувања поврзани со нејзиниот приватен живот.
Во 2016 година изјави дека луѓето можат да бидат комплетни и без деца.
„Комплетни сме и со партнер, и без него. И со дете и без дете. Самите одлучуваме што ни е убаво кога станува збор за нашите тела. Таа одлука е само наша. Не мора да бидеме мажени или мајки за да бидеме комплетни жени. Самите си одредуваме што значи да бидеш среќен до крајт на животот“, порача Анистон.
Додаде дека со години ја штитела нејзината животна приказна за борбата со неплодноста и неуспешните обиди да се оствари како мајка, бидејќи сакала тој дел да си го задржи за себе.
„Светот создава приказни кои се лажни, па дојде време да ја кажам вистината. Се чувствувам како да сум излегла од хибернација. Немам што повеќе да кријам“, заклучи Анистон.