Последните два осминафинални натпревари од Лигата на шампионите се закажани за вечерва кога првите средби ќе ги имаат Наполи - Барселона и Порто - Арсенал.
Наполи и Барселона во натпреварот влегуваат со променливо расположение, а тоа особено се однесува на италијанскиот шампион кој е во голема криза. Во последните четири кола од Серија А освоија само 5 бода, а претходно го загубија и италијанскиот Суперкуп од Интер. Од друга страна, Барселона малку ја подигна формата по поразот од Виљареал и освои 10 бода во последните четири лигашки кола.
Натпреварот ќе се игра на стадионот „Диего Армандо Марадона“, кој е особено специфичен за овој натпревар, бидејќи славниот Аргентинец остави голема трага во и Наполи и во Барселона, па многумина овој натпревар го нарекуваат Дерби на Марадона.
Наполи ќе остане без услугите на Пјотр Желињски, додека Барселона не може да смета на Маркос Алонсо, Алехандро Балде, Гави и Феран Торес.
Забрефтаниот Арсенал е апсолутен фаворит против Порто, а на овој натпревар влегува во одлична форма бидејќи има 5 последователни победи во Премиер лигата. Од друга страна, Порто имаше проблеми во последно време, па во февруари веќе направи два кикса против Риу Аве и Арука.
Вечерва за Порто сигурно нема да играат Иван Маркано, Гонсалу Рибејру, Мехди Тареми и Заиду Сануси, а надвор од терените за Арсенал се Габриел Жесус, Томас Парти, Јуриен Тимбер, Такехиро Томијасу и Олександр Зинченко. Настапот на Фабиу Виејра е под знак прашалник.
Двата натпревара ќе се играат од 21 часот, а директен пренос ќе даваат МРТ1 од Наполи - Барселона и Arenа Premium 2 од Порто - Арсенал.
