Пауло Дибала ќе го напушти Јувентус на крајот на сезоната.
Сè уште не се знае во кој клуб ќе ја продолжи кариерата, а во тој контекст се споменуваа Арсенал, Њукасл, Атлетико, Интер и други големи клубови.
Според вестите кои ги носи италијански Corriere dello Sport, една опција е најверојатна.
Станува збор за италијанскиот клуб Рома. Жозе Мурињо, главниот тренер на римскиот клуб, зимава му пришол на Дибала и му рекол дека многу го посакува во својот клуб. Според италијанскиот весник, еден од агентите на Дибала смета дека за неговата кариера најдобро е да остане во Серија А, па жестоко ја заговара Рома во најтесниот круг на Аргентинецот.
„Ти си одличен играч и сакам да те тренирам“, наводно му рекол Мурињо. Менаџерот на Дибала требаше да пристигне во Рим за последната рунда преговори, но сите пропаднаа поради поразот на Рома од Фиорентина.
Имено, Рома сè уште нема обезбедено пласман во Европа за следната сезона.
На Дибала му се допаѓа идејата да работи со Мурињо, а Италијанците пишуваат дека важен фактор во одлуката е фактот што ја обожава атмосферата на натпреварите на Рома. Тој ги следеше натпреварите на Рома против Боде/Глимт и Лестер во Конференциската лига и беше воодушевен од атмосферата.
