Навистина е тешко да се одлучи вистинското време кога треба да го запознаете вашето дете со магичниот универзум на „Star Wars“, но Disney само што ви ја олесни таа задача. Од студиото објавија дека лансираат нов серијал на детски кратки анимирани филмови наречен „Star Wars Galaxy of Adventures“.
Првите шест кратки филмови ќе се појават на 30 ноември на YouTube каналот Star Wars Kids.
Овој нов серијал е очигледно наменет за најмладите потенцијални фанови на „Star Wars“. Децата обично се многу позаинтересирани за кратки епизоди од 10 до 20 минути, отколку за долгометражни филмови, па затоа студиото Disney реши дека најдобриот начин за запознавање на децата со класичните приказни од универзумот на „Star Wars“ е преку кратки анимирани филмови кои ќе се прикажуваат на YouTube.
„Низ текот на годините многу пријатели ми кажаа дека им е многу тешко да ги запознаат нивните деца со ‘Star Wars’ бидејќи не знаат дали децата ќе бидат подготвени за гледање толку долги филмови“, вели Џејмс Вон, потпретседателот на Lucasfilm.
Лансирањето на каналот Star Wars Kids всушност покажува од колкаво значење се децата за Disney, без разлика на тоа што главниот профит доаѓа од долгометражните филмови. Студиото продуцира неколку долгометражни филмови кои ќе излезат во текот на наредните неколку години, но и две телевизиски серии кои ќе ја обработуваат тематиката на „Star Wars“ универзумот.