Росоман 83 е прв македонски машки фудбалски клуб со женски тренер. Екипата која сезонава ќе настапува во Втората лига група Исток скрши големо табу за нашите простори.
Неверојатно за македонски услови, но машкиот фудбалски тим на Росоман 83 ќе биде предводен од женски тренер. Иако ова не е табу во Европа и Северна Америка, кај нас досега не се случило. За сè има првпат, па еве конечно и во Македонија на зелениот терен ќе видиме како женски тренер предводи машка екипа.
Росоман 83 од кавадаречкото село Росоман се врати во Втората лига по цели 22 години играње трета и општинска лига откако во минатата прекината сезона беше лидер во 3.МФЛ Центар. Управата на клубот деновиве донесе одлука тренерската палка да ѝ ја довери на Драгана Костова, 29-годишна фудбалерка која досега настапуваше за скопски Драгон од женската лига, а е и поранешна репрезентативка на женската репрезентација на Македонија. Играше во одбраната, а претходно настапуваше и за Тиквешанка од родниот Кавадарци, како и за Наше Такси. Се работи за авторитетна личност, па не е случајно што иако сè уште млада заплива и во тренерските води и тоа во машка екипа. Таа поседува тренерска А лиценца.
„Драги наши поддржувачи и пријатели, од вчера официјално ШЕФ(ица) на стручниот штаб на ФК РОСОМАН 83 е Драгана Костова!
Со среќа Драгана, имаш поддршка од сите, а исто така имаш и искусни соработници во тренерската екипа од кои ќе научиш уште повеќе!
⚽️ НАПРЕД РОСОМАН!“, се пофали клубо на својот официјален Facebook профил.
