Видео го прикажува страшниот момент кога петкатница во Шпанија се урна речиси по една секунда откако нејзините жители беа евакуирани.
Жител на зградата во градот Теруел, регионот Арагон, во вторникот наутро повикал пожарникари откако начул нешто како чкрипење.
Кога пожарникарите пристигнале на местото на настанот, некои станари веќе ја имале напуштено зградата откако слушнале застрашувачки звуци и виделе пукнатини.
Штом пожарникарите завршиле со евакуацијата на преостанатите станари, зградата во која било сместено 21 семејство, драматично се урнала.
Според локалните медиуми, колапсот се случил „секунда“ по завршувањето на евакуацијата.
Причината за уривањето сè уште не е позната. Сепак, некои жители се загрижени дека неодамнешните дождови во комбинација со неисправен систем за одводнување можеби се причината за ваквата случка.
Неколку дена претходно, неколку станари отишле во Градската куќа да пријават проблем со вода.
Неколку часа по колапсот, новинарот, писателот и добитник на литературна награда, Хавеер Сиера, кој живеел во зградата со своите родители кога бил дете, се огласи на Twitter и напиша: „Сакаме да испратиме голема прегратка до семејствата кои видоа како денес им се уништуваат домовите“.
Локалниот полицаец Анхел Лорас изјави за локалните медиуми: „Основните структури беа како хартија, тие целосно се распаднаа и предизвикаа уривање на зградата под притисок“.
Претходно за време на невреме во овој регион наврна голема количина на дожд.
Жителка на зградата, Елвира Мартѝн, за локалните медиуми изјави: „Се јавивме во градското собрание. Во петокот бевме таму и пријавивме дека водата сè уште влегува, барајќи од нив некој да погледне, но не ни обрнаа внимание.
Антонио Армуниа, чиј магацин бил во подрумот на зградата, рече: „Зградата не беше толку стара. Градското собрание не ја проценило ситуацијата и само го повикало водоводното претпријатие. Синоќа се симнав во гаражата и имаше многу вода. Да се случеше додека спиевме, сите ќе бевме мртви“.
