Светската, европска и олимписка шампионка во џудо, Марго Пино (27) на Twitter објави потресна вест.
Таа објави фотографија на која ѝ се гледа деформираното лице, откако била тешко претепана од нејзиниот партнер и тренер Ален Шмит (38).
Шмит веднаш потоа бил уапсен за насилство врз освојувачката на олимпискиот златен медал во Токио, а Пино ја објави својата верзија на настаните.
„Ноќта саботата кон неделата бев жртва на напад во мојот дом од страна мојот партнер и тренер. Бев навредувана, тепана, неколку пати ми ја удираше главата од земја. И на крајот ме давеше. Мислев дека ќе умрам, но успеав да избегам кај соседите кои веднаш повикаа полиција. Имам неколку повреди меѓу кои и скршен нос“, напиша Пино на социјалните мрежи.
27-годишната девојка добила бројни удари по лицето од партнерот и тренер, кој бил во алкохолизирана состојба, соопштија полициски извори, а потоа била пренесена на лекување во болницата Авицена во Бобињи.
Шмит заврши во затвор 48 часа, но потоа беше ослободен. Во образложението на судот се наведува дека немаат доволно докази против него, поради што е пуштен на слобода. Тој тврди дека никогаш не ја удрил Пино и дека повредите настанале откако таа се лизнала и паднала по нивна „љубовна расправија“.
Француската џудистка сепак планира да поднесе жалба, а Шмит наводно добива смртни закани.
Пино во досегашната кариера беше светска шампионка во 2019 година, а има и два златни медали од европските првенства во 2019 и 2020 година.
