Британската поп ѕвезда Ед Ширан откри дека го снимил својот најнов спот во Киев, главниот град на Украина, само неколку дена пред Русија да ја нападне земјата.
Пејачот и текстописец во петокот наутро на својот официјален YouTube канал објави видео за песната „2step“ за која соработуваше со раперот Лил Бејби.
Пред да започне песната, на екранот се појавува пораката на Ширан, објаснувајќи дека тој го снимил видеото во Киев пред „да почнат разорните акти на насилство“.
„Тоа беше мојата прва посета на земјата и се чувствував толку добредојден“, рече тој.
„Украина е горда и издржлива земја и благодарен сум што имав можност да го снимам моето видео таму“, рече тој.
Откако ја претстави убавината на Украина во својот спот, Ед Ширан откри дека вложува дополнителни напори да ѝ помогне на земјата.
Во првата сцена на видеото, музичарот откри и дека сите приходи од стримовите на YouTube ќе бидат наменети за хуманитарна помош за Украина.
„Иако ми беше прв пат таму, брзо ми се допаднаа луѓето и местото“, напиша Ширан на Instagram, „Немаше никаков знак од ужасот што дојде во Украина и моето срце е со сите таму“.