Традиционално воочи муслиманскиот празник рамазан верниците на Балканот подготвуваат десерти, а доста популарна е босанската алва, која, се разбира, може да ја јадат сите, без разлика на верата.
Алвата потекнува од Персија, а преку Блискиот Исток и Отоманската Империја стигнала на Балканот, каде и денес е многу популарна, особено во Грција и Турција.
Во Босна и Херцеговина алвата, или како што тие ја нарекуваат - халва, се подготвува по повод мубарек ноќта и воочи празниците, како и по повод рамазан.
Во османлискиот период овој десерт го правеле и продавале алваџиите во нивните алваџински продавници. До 1908 година во Сараево имале специјална чаршија за халваџилук. Со оваа работа најмногу се занимавале Македонците и Албанците.
Алва е слатко јадење направено од брашно, масти или шеќер и од сусам или други адитиви.
Потребни состојки:
- 100 гр путер или маргарин
- 100 гр брашно
- 100 гр шеќер
- 200 мл вода
- 1 ванилин шеќер
- ореви или кокос за декорација
Подготовка:
Првата работа што треба да ја направите е да стопите 100 грама путер и да оставите целосно да се растопи. Потоа додадете 100 грама брашно. Потребно е смесата постојано да се меша 10 минути, внимавајќи да не изгори алвата.
Во друга тава ставете 200 милилитри вода и 100 грама шеќер и додадете една кесичка ванилин шеќер. Потоа зовријте ги водата и шеќерот и додадете ги во смесата со путерот и брашното. По неколку секунди почнете да ја мешате смесата за да не се формираат грутки.
Кога алвата е готова, оставете ја да се излади неколку минути, а потоа обликувајте ја со лажица. На крајот секое парче алва украсете го со ситно сечкани ореви или кокос.
