Електрично возило со автономија од 400 километри, во зимски услови ќе може да помине само 236 км - ако го вклучите греењето.
Производителите на електрични автомобили често се фалат со автономијата на своите возила, но сето тоа не значи многу кога ќе дојде зимата и ќе се стопи предноста.
Електричните возила сè уште немаат квалитетен одговор на температури под нулата, според студијата спроведена од Американскиот авто-клуб (ААА) за губење на автономијата на електричните автомобили при возење во различни временски услови на 1.600 километри.
Тестовите се одвиваа на три различни надворешни температури: -6, 23 и 35 степени Целзиусови.
Во случај на просечна амбиентална температура од -6 степени, утврдено е дека комбинираната автономија во возење е пониска за 12 проценти во споредба со декларираната, додека падот на автономијата на температура од 35 степени резултираше со намалување на радиусот на движење за 4 проценти.
Овие резултати се однесуваат на загубите на енергија предизвикани само од отстапување од референтната температура од 23 степени.
Меѓутоа, кога на тоа ќе се додаде потрошената струја за работење на системите како оној за греење, климатизација или вентилација, падот на автономијата е подрастичен.
Така, при возење на -6 степени, реалниот радиус на движење со вклучено греење и вентилација беше дури 41% помал од декларираниот. Ова значи дека во тешки зимски услови, електричен автомобил со автономија од 400 километри всушност ќе помине само 236 километри пред да му се истроши батеријата.
Падот на автономијата е значаен и во случај на возење на високи летни температури, па така на 35 степени Целзиусови изнесуваше 17%, покажува тестот.