Елиф Елмас (24), играчот од средниот ред на Лајпциг и на македонската репрезентација, го најави вечерашниот прв осминафинален натпревар во Лигата на шампионите против Реал Мадрид.
На шпанските новинари им откри дека омилен играч на Реал му е Лука Модриќ.
„Слушајте, јас сум од Балканот и може да имам само еден избор, а тоа е од срце: Лука Модриќ. Сѐ што направи со Реал и Хрватска е неверојатно. Ја освои Златната топка. Не велам дека во Реал нема уште многу врвни играчи, но мене омилен ми е Лука. Знаете, тој е многу посебен за сите нас Балканците. За мене тој е број 1 на просторите на поранешна Југославија. Секако дека го имам неговиот дрес“.
Елмас во Лајпциг пристигна од Наполи во зимскиот преоден за обесштетување од 23 милиони евра.
Претходно во фазата по групи со Наполи играше токму против Реал. Настапи на двата натпревара влегувајќи од клупата на 25 и 20 минути пред крајот, а Наполи двапати загуби. Сега со Лајпциг Елмас има шанса за одмазда.
И вечерва Елмас не е стартер и својата шанса против Реал ќе ја чека од клупата за резерви.
