Фудбал

Емери: Да имаше ВАР, ПСЖ немаше да испадне од Барса во 2017

11. февруари 2020 - 14:45 | Ф.З.

Баскискиот тренер се наврати на скандалозниот епилог од осминафиналето во Лигата на шампионите пред три години.

Од сезоната 2016/17 Унаи Емери седеше на клупата на богатиот француски клуб каде остана и наредната сезона пред да замине во Арсенал. Ќе остане запаметен по историската елиминација со „Светците“ од Лигата на шампиони иако имаше водство од 4:0 над Барса по првиот натпревар во осминафиналето од ЛШ таа сезона. На реваншот загуби со 6:1 со два пенала и два гола примени во судиското надополнување.

Во интервју за France Football стратегот обвини дека тогаш неговиот клуб испаднал поради судиски грешки и дека доколку тогаш имало ВАР епилогот ќе бил сосема поинаков.

„Со ПСЖ ја освоив Лиг 1, четири купа и два суперкупа. Сепак, целта беше да се освои Лигата на шампиони. Во мојата прва сезона во клубот одигравме маестрален прв натпревар против Барселона, но на реваншот бевме елиминирани бидејќи во тоа време ВАР не постоеше. Кристално јасно е дека испаднавме поради судиски одлуки“, смета Унаи.

Наредната сезона авантурата на ПСЖ исто така заврши во осминафиналето, овој пат од Реал Мадрид откако загуби на двапати, 1:2 и 1:3. Сепак, Емери и за овие натпревари има замерки.

„Наредната сезона, против Реал Мадрид, изгубивме од тимот кој потоа испиша историја освојувајќи ја третата титула по ред. Но, тогаш исто така имаше судиски грешки“, заврши Емери кој моментално е без ангажман откако на крајот од ноември доби отказ од Арсенал.

Коментирај