Европскиот парламент вчера усвои резолуција со која, меѓу другото, се осудуваат напорите на Русија да ги искористи етничките тензии на Западен Балкан за разгорување на конфликти и поделба на заедницата.
Станува збор за Резолуција за странско мешање во демократските процеси во ЕУ, за која гласаа 552 европратеници, 81 против и 60 воздржани.
Тоа ја вклучува загриженоста на европските пратеници во врска со „обидите на Православната црква во земји како Србија, Црна Гора и Босна и Херцеговина, особено во ентитетот на Република Српска, да ја промовира Русија како заштитник на традиционалните семејни вредности и да ги зајакне односите меѓу државата и црквата“, објави Радио Слободна Европа.
Во резолуцијата, меѓу другото, се наведува дека ЕП е вознемирен што Унгарија и Србија им помагаат на Кина и на Русија во нивните геополитички цели.
Таа повикува на дијалог со граѓанското општество и приватниот сектор во Западен Балкан за да се координираат напорите за дезинформација во регионот.
Во резолуцијата се наведува дека „злонамерните и авторитарни земји, како Русија и Кина, манипулираат со информациите со цел да ја нарушат демократијата на ЕУ“. Европратениците предупредуваат дека европските граѓани, како и владите, „не се свесни за заканата“ од овие акции.
