Турскиот претседател Реџеп Тајип Ердоган го суспендираше фудбалското првенство по насилството на натпреварот меѓу Анкарагуџу и Ризе.
Претседателот на Анкарагуџу, Фарук Коџа, го нокаутираше главниот судија Халил Умут Мелер, откако тој означи крај на натпреварот. Ризе успеа да освои бод со голот постигнат во 7. минута од натпреварот.
Додека Мелер лежеше на земја, неколку навивачи кои влегоа на теренот исто така му зададоа удари.
Како што пренесуваат тамошните медиуми, Мелер и Коџа по инцидентот биле пренесени во болница, претседателот на клубот под полициска придружба со најава дека ќе биде приведен откако ќе добие лекарска помош.
„Инцидентот се случи поради погрешните одлуки на судијата и неговото провокативно однесување. Мојата цел беше да реагирам вербално, да го плукнам в лице, но ги загубив нервите и го удрив. Сепак, мојот удар не беше толку силен за да му нанесам фрактура“, е дел од објаснувањето на Коџа.
По инцидентот кој стана главна спортска вест ширум светот, претседателот на Турција го прекина првенството.
„Го осудувам нападот на судијата, му посакувам брзо закрепнување“, рече Ердоган,
„Спортот значи мир и братство. Спортот е неспоив со насилство. Никогаш нема да дозволиме насилството да го зафати турскиот спорт“.
Потоа, претседателот на Турската фудбалска федерација (ТФФ), Мехмед Бујукекси, потврди дека турската Суперлиг е „одложена на неодредено време“.
Мелер има 37 години и се наоѓа на елитната судиска листа на УЕФА.