Минатата недела, Европскиот парламент даде конечно одобрение за промена на правилата за наплата на патарина на патиштата во мрежата TEN-T, кои земјите-членки можат да ги воведат за камиони, автобуси, комбиња и автомобили.
Новите правила, усвоени во четвртокот, не ги обврзуваат земјите-членки да воведат патарини, но доколку одлучат да ги воведат, ќе мора да ги почитуваат правилата на ЕУ, пишува plutonlogistics.com
Промената, која важи и за камионите, налага патарините веќе да не функционираат според системот за наплата одреден временски период (како вињета), туку како компензација за поминатото растојание (за поминати километри). Целта на оваа промена е да се подобри функционалноста на принципите „загадувачот плаќа“ и „корисникот плаќа“.
Во случај новите давачки да бидат непропорционални со очекуваните приходи, државите ќе имаат можност да чуваат вињети на одредени делови од мрежата TEN-T.
Новите правила предвидуваат и определување на различни давачки за камиони и автобуси, врз основа на емисиите на CO2, како и за комбиња и минибуси, врз основа на нивните „еколошки перформанси“.
Најавено е и значително намалување на патарините за возилата со нула или ниска емисија.
Правилата влегуваат во сила 20 дена по нивното објавување во Службениот весник на ЕУ. Земјите-членки ќе имаат две години да се подготват за нивно спроведување.