Роџер Федерер соопшти дека нема да настапи на Олимписките игри во Рио де Жанеиро, но и дека нема да се појави на тениските терени до крајот на 2016 година.
Швајцарецот по консултација со лекарите решил да го пропушти остатокот од сезоната за целосно да се рехабилитира од повредата на коленото.
„Драги навивачи, екстремно сум разочаран што објавувам дека нема да ја претставувам Швајцарија на ОИ во Рио де Жанеиро, но и што ќе го пропуштам остатокот од сезоната. Разгледувајќи ги опциите по консултација со лекарите и со мојот тим, донесов одлука да ја завршам 2016 година, бидејќи ми е потребна интензивна рехабилитација на коленото.
Докторите ме советуваа дека паузата ми е потребна доколку сакам да играм уште неколку сезони. Тешко ми е што ќе го пропуштам остатокот од сезоната. Сепак, позитивно е што сфатив колку во досегашниот тек од кариерата имав среќа со повредите. Љубовта која ја имам кон тенисот, кон натпреварувањето и кон вас навивачите, останува недопрена.
Мотивиран сум како и секогаш и се надевам дека ќе се вратм уште посилен, дека ќе бидам здрав да го играм мојот најдобар тенис во 2017 година. Ви благодарам на поддршката“, напишал Федерер.
