Lamborghini Urus доби достоен ривал.
По долгогодишно исчекување, конечно ја видовме премиерата на Ferrari Purosanguе, модел со два реда седишта, два пара врати и зголемено растојание од подлогата. Откако речиси сите конкуренти се потрудија да понудат суперпрестижни SUV модели, адекватен одговор дојде и од Маранело.
Очекувано, Ferrari не загриза премногу во SUV-манијата, туку својот подигнат модел повеќе го замислил како тркачки GT кој прво се „растегнал“ за дополнителен пар врати, а потоа го подигна.
Некои ќе речат дека ова е еволуција на дизајнот замислен со моделот Roma.
За разлика од Lamborghini Urus, овде задните врати се отвораат во спротивна насока, под агол од 79 степени, што го прави Purosangue попривлечен, но и попрактичен бидејќи патниците кои седат назад ќе можат полесно да седнат на своите седишта.
Она што радува е бескомпромисното возење. Некои најавуваа шест цилиндри, но на крајот беше избран атмосферски V12 за погон.
Тој произведува 725 КС и 716 Nm максимален вртежен момент, па благодарение на погонот на четири тркала автомобилот до 100 км/час стигнува за 3,3 секунди, 200 км/час достигнува за 10,6 секунди и не запира до максималните 312 км/час, што е најдобар резултат во овој сегмент.
Да напоменеме и дека моторот врти до 8.250 вртежи во минута, а одличните возни карактеристики се обезбедени со речиси идеална распределба на масата (49:51).
Purosangue не е првото Ferrari со погон на сите тркала, но е прво со контрола на возење по нагорнина (hill-descent control) и прво со активен систем против превртување.
Производителот истакнува дека автомобилот може да се подигне до максимум 183 mm од подлогата, а суспензијата го користи системот FAST (Ferrari Active Suspension Technology).
Како што веќе беше истакнато, ова Ferrari има втор ред седишта, односно во задниот дел можат да се сместат уште двајца патници. Што се однесува до функционалноста, тој исто така има багажник до 473 литри, што го прави најпрактичното Ferrari во 75-годишната историја на марката.
И уште нешто - за разлика од конкуренцијата, Ferrari не ја ископира внатрешноста од другите модели во гамата, туку дизајнираше сосема нов стил.
Во кабината нема централен екран, но затоа и возачот и совозачот имаат по еден пред себе.
Во внатрешноста не недостасува простор, бидејќи овој автомобил е во должина нешто помалку од пет метри, додека ширината е над два метри (4.973/2.028/1.589 mm).
Цената се уште не е официјално објавена, но некои италијански медиуми споменуваат почетна цена од 400.000 евра. Во Ferrari, на прашањето за цената, само велат „тоа е сепак V12 Ferrari“.
Сметаат дека цената не е важна, а уште помалку одлучувачка информација за потенцијалните купувачи.
МЕГА галерија: Погледнете го Ferrari Purosangue од сите агли