Боксерскиот шампион Тајсон Фјури (35) и поранешниот шампион на УФЦ Френсис Нгану (37) вечерва ќе се борат според боксерските правила во Саудиска Арабија.
Вчера се одржа официјално мерење и соочување пред овој бизарен натпревар, а и двајцата борци се однесуваа примерно.
Конфронтацијата помина без поголеми тензии, а Нгану беше најтежок во кариерата пред оваа борба со 123 килограми. Фјури влегува три килограми потежок во борбата која е закажана за десет рунди.
Вечерашниот настан во Ријад, Саудиска Арабија започнува во 19 часот, а Фјури и Нгану треба да влезат во рингот околу 23:30 часот.
Фјури треба да инкасира најмалку 50 милиони евра, а Нгану околу 10.
По оваа борба Фјури го очекува мечот со Олександр Усик за обединување на титулите во тешка категорија во декември или јануари, додека Нгану уште го чека името на противникот со кој ќе се бори во ММА организацијата ПФЛ.