Светот на фудбалот полека, но сигурно станува свет во кој технологијата е неопходна. Еден лондонски клуб реши дека има целосна доверба во технологијата, па „вработи“ вештачка интелигенција која е задолжена да го одбира составот и тактиката за натпреварите на тимот.
Клубот Вингејт енд Фичли, кој игра во седмата англиска дивизија, направи партнерство со компанијата за вештачка интелигенција The Big Bang Fair, со кое вметна робот со вештачка интелигенција кој е задолжен да извршува тренерски задачи.
Се работи за паметен звучник кој е поврзан со компјутер и користи информации добиени од тренери и менаџери за да креира тактики, да ги одбира играчите од составот, па дури и да составува мотивациони пораки.
На пример, тренерот на тимот би можел да го запраша паметниот звучник која би била најдобрата формација за вечерашниот меч. Вештачката интелигенција ја прима таа информација, ја преработува, споредува податоци и ги анализира противниците пред да му даде конечен одговор. AI тренерот може да го одбира составот, да предложи замена, а е дизајниран на тој начин што учи додека работи и постојано се надградува.
„Беше многу интересно за првпат да се види како вештачка интелигенција работи заедно со играчите и тренерите за да го прошири своето знаење за играта, помагајќи и развивајќи нови начини на правење одлука“, рече тренерот на тимот, Дејв Норман.
Новиот систем беше за првпат употребен на тренинг на клубот, а за првпат ќе биде употребен на натпревар следниот месец, кога на 9 февруари тимот на Вингејт енд Фичли ќе се соочи со Уајтхок.
