Продуцентот Питер Сафран и режисерот Џејмс Ган го презедоа раководството на филмскиот универзум на DC во ноември 2022 година, а минатиот декември беше објавено дека Wonder Woman 3, што требаше да го режира Пети Џенкинс, нема да се снима.
Гал Гадот, која во последните неколку години ја гледавме во улогата на Дајана Принс, позната како Wonder Woman, конечно проговори за тоа што значи откажувањето на Wonder Woman 3 за нејзината кариера и во каков правец планира да оди во иднина, пишува Deadline.
„За мене е неверојатнo стартувањето и развивањето на приказни за кои сум заинтересирана“, рече Гадот во интервју за Total Film. „Фактот што повеќе не морам да седам мирна дома и да чекам понуди е нешто што ми дава сила. Уживам во тоа, ме одржува во живот“.
„Нема да работам само на мои проекти, сепак ќе работам и како актерка во туѓи филмови. Но, фактот дека можам да зборувам за приказни за кои имам голема страст, кои сама сум ги смислила или ги смислиле луѓе со кои сакам да работам, е неверојатна работа“, додаде актерката.
Сè уште не е познато дали актерката ќе престане да се појавува како Wonder Woman во други проекти на DC, но пред да биде откажан филмот, таа сподели трогателна порака на Twitter.
„Пред неколку години беше најавено дека ќе ја играм Wonder Woman. Многу сум благодарна за можноста да портретирам таков неверојатен, легендарен лик и најмногу од сè сум ви благодарна вам, на обожавателите. Едвај чекам да го споделам нејзиното следно поглавје со вас“, напиша Гадот.