Најавата дека израелската актерка Гал Гадот прифати да ја толкува улогата на најславната египетска владетелка, Клеопатра, наиде на негативни коментари во јавноста. Гал Гадот им одговори на критичарите, кои сметаат дека главната улога треба да ја толкува актерка со арапско потекло.
„Како прво, ако сакате да бидете верни на фактите, тогаш треба да знаете дека Клеопатра била Македонка“, изјави израелската актерка во интервју за BBC Arabic. „Баравме македонска актерка која би се вклопила во улогата на Клеопатра, но не најдовме. Јас сум многу заинтересирана за улогата“, вели таа, пренесе Times of Israel.
Таа додаде дека за неа етничкото потекло никогаш не е важно, истакнувајќи дека луѓето се луѓе.
„Имам пријатели од целиот свет, муслимани, христијани, католици, атеисти, будисти, Евреи. Сакам само да искажам почит кон ликот и делото на Клеопатра, на која многу ѝ се восхитувам“, вели 35-годишната Гал.
Улогата на Клеопатра, која често ја опишуваат како последен активен владетел на египетското кралство пред да биде освоено од Рим, претходно беше отелотворена од легендарната актерка Елизабет Тејлор во истоимениот филм во 1963 година.
Кастингот за новиот филм предизвика негативни реакции бидејќи многумина сметаат дека улогата треба да ја толкува црнкинка или Арапка. Режисерка на филмот е Пети Џенкинс, а Гал Гадот е една од продуцентите.
„Знаете, секој може да го направи овој филм. Но, јас сум многу среќна што можам јас да го направам“, вели Гадот.