Фудбалерите на Гана ги задржаа шансите за пласман во осминафиналето на Светското првенство во Катар, откако денес ја совладаа Јужна Кореја со 3:2 (2:0) и ги запишаа првите бодови во групата Х по стартниот пораз од Португалија.
Гана на стадионот „Едјукејшн“ во Ал Рајан поведе во 24 минута преку Мохамед Салису, а го удвои водството само десет минути подоцна со голот на Мохамед Кудус.
Јужна Кореја се врати резултатски во игра во интервал од само три минути преку двојниот стрелец Чо (58, 61), но Кудус со неговиот втор гол на натпреварот во 68 минута донесе триумф на африканската репрезентација.
Гана во последното коло ќе игра со Уругвај, додека Корејците остануваат на еден освоен бод и ќе се сретнат со Португалија.
Второто коло во групата Х ќе го комплетираат Португалија и Уругвај, вечерва од 20 часот во Лусаил.
