Германската влада на располагање става 750 милиони евра за да го забрза производството и развојот на вакцина против новиот коронавирус.
Сојузната германска министерка за образование и развој Ања Карличек изјави дека околу 500 милиони евра ќе одат на научни студии и испитувања на вакцини, додека 250 милиони евра ќе бидат наменети за проширување на производствените капацитети во Германија.
Бројни универзитети и компании низ светот, вклучително и Германија, брзаат да развијат вакцина против вирусот кој предизвика пандемија.
Во Германија се заразени 172.870 луѓе, додека починаа 7.673 луѓе. Направени се над 2,7 милиони тестирања.
Ангела Меркел во вчерашно обраќање потенцираше дека граѓаните мора да ги почитуваат мерките за социјално дистанцирање. Таа додаде дека ќе мора да носат заштита над устата и носот и по ублажувањето на рестриктивните мерки.
„Многу ми е важно повторно да укажам на фактот дека влегуваме во нова фаза на пандемијата и дека сега ќе биде неопходно да, покрај релаксирање на мерките, да бидеме сигурни дека луѓето ќе ги почитуваат основните правила, а тоа се: одржување дистанца, носење заштита преку устата и носот за заштита на другите. Тоа е многу важно. Ви благодарам“, изјави во најкраткото обраќање германската канцеларка и замина.
Невообичаеното обраќање Меркел се толкува како реакција на демонстрациите одржани во текот на викендот низ градовите ширум земјата, кога стотина луѓе се собраа да изразат протест поради кршењето на нивните граѓански слободи, при што многумина од нив не ги почитуваа мерките за заштита.