Германскиот генетичар Волфрам Хен смета дека луѓето кои не сакаат да се вакцинираат против коронавирусот, треба да се откажат од респиратор или од интензивно лекување, ако се заразат со вирусот.
Хен, исто така, смета дека оние кои не сакаат да се вакцинираат, треба со себе да носат документ кој објаснува дека не сакаат вакцинација, пренесе DW.
„Кој сака да ја одбие вакцинацијата, би требало, ве молам, секогаш со себе да носи документ на кој ќе пишува: ‘Не сакам да се вакцинирам! Сакам да ја препуштам заштитата против болеста на другите! Сакам, ако се разболам, својот кревет за интензивна нега и респиратор да им го препуштам на другите’“.
Докторот вели дека е сосема во ред луѓето да се загрижени поради вакцината која се појави неочекувано брзо. Не му сметаат ако постојат луѓе со критични, добро истражени прашања на кои сакаат да добијат одговор.
Луѓето за кои нема време и разбирање се оние кои своите податоци ги добиваат од групи на Facebook без медицинска потпора.
„Итно им препорачувам на тие паничари да одат во најблиската болница и да ги презентираат нивните теории на заговор пред докторите и медицинските сестри кои исцрпени доаѓаат од преполнетите одделенија на интензивната нега“, вели тој.
Во одвоено интервју за германски WDR, д-р Хен објасни дека лекарите секогаш ќе ги лекуваат болните луѓе, вклучително и оние кои се против вакцините.
Меѓутоа, апелира дека ако луѓето се свртат против нешто како вакцинацијата, тогаш навистина би требало да размислат за последиците на нивните дела.
