Со 34.000 жители, Гибралтар не може да биде пример за другите, но тоа е првото место во Европа каде, благодарение на вакцинацијата, епидемијата е во голема мера надмината. Рестораните се отворени до доцна во ноќта и нема позитивни случаи.
Бидејќи маските повеќе не мора да се носат на отворено, Саманта Сакраменто постојано има чувство дека нешто заборавила кога шета по улиците.
„Мислам дека допрва претстои да се опоравиме психолошки“, вели министерката за здравство на оваа мала британска област на јужниот 'рт на Пиринејскиот Полуостров.
Укинати се забраните за излегување, баровите и рестораните се отворени до 2 часот по полноќ, како и пред пандемијата. Шпанските телевизии го обиколуваат Гибралтар и разговараат со луѓе кои чувствуваат олеснување.
„Можеби наскоро ќе можеме да живееме како порано“, вели една келнерка.
Сосема спротивно од остатокот од Европа, каде што мерките се засилуваат поради зголемениот број на инфекции.
Од друга страна, Гибралтар со 34.000 жители го имаше врвот на пандемијата на почетокот на јануари со 172 нови инфекции на ден. Во малата британска прекуокеанска област, смртта на 94 лица се поврзува со вирусот.
Ги вакцинираат и Шпанците
Во последните неколку дена, одделот за COVID-19 во локалната болница „Свети Бернард“ е празен. Нема позитивни.
Тоа, благодарејќи не само на острите мерки воведени претходно, туку и на речиси целосната вакцинација. Освен жителите, вакцинирани се и повеќето десетици илјади луѓе кои живеат во Шпанија, но работат во Гибралтар и патуваат секој ден. Во Андалузија, соседен шпански регион, состојбата со вирусот и вакцинацијата не е воопшто розова.
Вакцинацијата во Гибралтар, со вакцини доставена од Обединетото Кралство, не е голем логистички предизвик – целата земја зафаќа 6,5 квадратни километри.
Набрзина се вакцинирани речиси сите, освен 3 проценти од луѓето кои одбиваат вакцинација. Во оваа област веќе функционира еден вид ковид-пасош, односно документ со кој луѓето потврдуваат дека се вакцинирани.
Сепак, не е баш сè како порано. Администрацијата на Гибралтар игра со претпазливост, па маските сепак треба да се носат во продавниците. Неодамна се одржа боксерски натпревар со 500 гледачи, кои имаа дозвола да присуствуваат само ако се целосно вакцинирани. Дури и пред тоа, тие беа тестирани со брз тест.
