Археолозите открија глава на статуа на Александар Македонски во Турција, речиси во совршена состојба.
Реткиот и уникатен предмет е пронајден на врвот на театар од римската ера, сместен во Конуралп, северно од Дузче и блиску до северозападниот брег на Турција. Се верува дека потекнува од 2 век и сега се наоѓа во музејот Конуралп, каде што го доставиле археолозите.
Поголемиот дел од античкиот театар беше откриен за време на ископувањата извршени во последните 12 месеци во општина Дузче, но неодамна беа пронајдени глава од скулптура на поранешниот водач Александар Македонски, како и на грчкиот бог Аполон и митското чудовиште Медуза при истражување во горниот дел на театарот, пишува Live Science.
Сите статуи се проучени од експерти по историја, како и од турското Министерство за ископувања и истражувања. Експертите утврдиле дека главата е точна претстава на Александар Македонски, иако била извајана веројатно 400 години по неговата смрт.
„Пронајдена е главата на Александар Македонски, со димензии 23 сантиметри. Дел од главата се очите од мермер, а има и траги од дупчење на зениците. Устата е малку отворена и не открива многу заби. Неговата долга виткана коса допира до вратот, додека на лицето има два прамена. Ваквата коса е специфична за Александар Велики“, велат експертите од музејот.
Александар Македонски се смета за еден од најголемите војсководци во историјата поради неговите извонредни освојувања и влијание врз античкиот свет.
Александар е роден во Пела, главниот град на Кралството Македонија, а негови родители биле кралот Филип II Македонски и кралицата Олимпија. По убиството на неговиот татко во 336 п.н.е., Александар бил крунисан за крал на Македонија. Тој започнал серија воени операции, од кои првата била инвазијата на Персија во 334 п.н.е. Тој изгради огромна империја која ги опфаќаше Грција, Египет, Персија и Индискиот потконтинент. Поголемиот дел од тогаш познатиот свет бил цел на неговите освојувања.
Александар Македонски умрел на 32-годишна возраст во 323 година п.н.е., а точната причина за смртта сè уште не е позната. Се шпекулира за природна смрт, болест и труење.