Еден од најголемите фудбалски таленти во светот, Џовани Рејна, нема среќа со повредите, а така беше и синоќа на гостувањето кај Штутгарт.
Американскиот фудбалер кој има само 19 години веќе неколку сезони игра на високо ниво, но само кога тоа му го дозволуваат повредите. Во последно време нема среќа, а сега повторно ќе отсуствува од терените.
На натпреварот меѓу Штутгарт и Борусија одигра само една минута. Беше заменет во 2. минута поради повреда на мускулот, тип на повреди кои оваа сезона зачестија во тимот од Дортмунд.
Кога при еден трк Рејна застана и се фати за мускулот на ногата, веднаш беше јасно дека нема да може да продолжи. Се чини како да не се загреал доволно за да настапи и дека повредата настанала при првиот силен спринт.
Лекарскиот тим го прегледа и констатираше дека е потребна замена, а тоа воопшто не му падна лесно на Рејна.
Соиграчите и тренерите го бодреа додека неутешно плачеше. Младиот фудбалер не сакаше да се помири со фактот дека е пред нова пауза.
Заработи голем аплауз од трибините, но ниту тоа не му помогна да ги задржи емоциите за себе.
Инаку Џовани е син на поранешната американска сокер легенда Клаудио Рејна кој настапи на 112 натпревари за САД, долги години беше капитен и ги предводеше „Јенките“ на дури 4 Мундијали (1994, 1998, 2002 и 2006), исто толку Голд купа (1996, 1998, 2000 и 2003), на Олимпијатата 1992 во Барселона, како и на Копа Америка 1995. Џовани се роди во Англија додека Клаудио настапуваше за Сандерленд, а кариерата ја почна во Њујорк Сити. Во Дортмунд е веќе четврта година.