Сега веќе пензионираниот шведски фудбалер Златан Ибрахимовиќ се појави на тренингот на Милан по тешкиот пораз на Росонерите од Интер во градското дерби со резултат 5:1 и им даде поддршка на играчите пред почетокот на Лигата на шампионите.
Милан, иако не одигра така лош натпревар, доживеа целосен дебакл во дуелот против Интер и на крајот доживеа тежок пораз со резултат 5:1, а два дена по споменатата катастрофа, Златан Ибрахимовиќ се појави на тренинг на поранешниот тим.
Според медиумите во Италија, Ибрахимовиќ дошол да ги поддржи фудбалерите на Милан и да ги тренира пред да продолжи сезоната. Поразот од Интер, да напоменеме и дека е прв сезонава што го доживеаја фудбалерите на Милан.
„Познато лице во Миланело (тренинг кампот на Милан)“, објави овој клуб на социјалните мрежи.
Утре, поточно во вторник, на домашен терен во Лигата на шампионите Милан ќе ги одмери силите со Њукасл, а во следното коло во италијанската Серија А на домашен терен играат против Верона.
Во два „мандати“ во Милано, Ибрахимовиќ на 163 настапи во сите натпреварувања постигна 93 гола и забележа 35 асистенции.
Тој одигра клучна улога во тимот откако пристигна на слободен трансфер во јануари 2020 година, а во сезоната 2021/2022, во која Росонерите ја освоија титулата, постигна осум гола на 23 првенствени натпревари.
