Капитенот на Интер, Мауро Икарди, го одбележа последното големо миланско дерби во кое со хет – трик ја суши екипата на Милан и беше апсоултна ѕвезда на вечерта.
Аргентинецот првиот гол го постигна во првото полувреме, потоа погоди и во второто, за во последната минута од пенал да го реши натпреварот во корист на својот тим кој оствари голема победа.
„Посебно е чувството кога ќе ја однесете дома топката од ваков натпревар. Тоа чувство не може да се опише. Знаев дека ќе бидам стрелец денес, тоа им го кажав на некои од соиграчите пред натпреварот. Ги оставив критичарите да зборуваат, а тогаш го направив она што беше потребно на теренот. Му помогнав на тимот да постигне погодоци. Не можеш секогаш да бидеш стрелец“, изјави Икарди по натпреварот.
Интер после поразот на Јувентус се најде на втората позиција на табелата на само два поени од лидерот Наполи, на кој клубот од Милано му гостува следниот викенд.