Twitter Blue најверојатно „се враќа кон крајот на следната недела“, рече сопственикот на социјалната мрежа, милијардерот Илон Маск во твит објавен доцна вчера.
Во петокот, Twitter ја суспендираше својата нова услуга за претплата од 8 долари со која добива сино знакче како потврда за автентичноста на профилот, бидејќи нејзиното воведување резултираше со голем број лажни профили со потврда за автентичност, како што се „автентичните“ профили на „ Исус Христос“ или Џон Ленон“.
Посакуваното сино знакче претходно беше резервирано за автентичните профили на политичари, новинари и други познати јавни личности.
Опцијата за претплата, отворена за секој кој сака да плати, беше воведена претходно оваа недела за да му помогне на Twitter да ги зголеми приходите, додека Маск се бори да ги задржи огласувачите.
Неколку корисници во петокот известија дека исчезнала новата опција за претплата со сино штиклирање како потврда, додека извор изјавил за Reuters дека таа е повлечена.
„За да се бориме против погрешното претставување, ја додадовме ознаката Official на некои профили“, беше објавено во петокот на профилот за корисничка поддршка на Twitter - кој е означен како „Official“.
Знакчето беше претставено во средата - но Маск го „згасна“ само неколку часа подоцна.
Во својот прв мејл до вработените во компанијата во четвртокот, Маск предупреди дека Twitter нема да може да ја „преживее претстојната економска криза“ доколку не ги зголеми приходите од претплати за да го надомести падот на приходите од рекламирање, изјавија за Reuters три лица кои ја виделе пораката.