Со победата над СПАЛ и киксот на Јуве против Сасуоло, „Нераѕурите“ после осум кола се вратија на врвот во Италија.
Откако Јувентус не успеа да го совлада Сасуоло во Торино и одигра само 2:2 притоа спасувајќи се од пораз со пенал, му овозможи на Интер да го преземе врвот на табелата во калчо лигата.
„Нераѕурите“ не ја прокоцкаа укажаната шанса и на дождливото време во Милано уште по првите 45 минути ја обезбедија победата против тимот на СПАЛ. Лаутаро Мартинес на двапати го матираше гостинскиот голман Етрит Бериша прво на асистенција на Марцело Брозовиќ, а потоа по одлично нафрлување на Антонио Кандрева.
Пет минути во второто полувреме домаќините му дозволија на СПАЛ да го направи натпреварот интересен. Матија Валоти се прошета низ одбраната на Интер и намали на 2:1. Сепак, до крајот остана тој резултат.
Сега на табелата Интер е прв со 37 бодови и има еден бод предност пред Јувентус кој падна на второто место. Трет останува Лацио со 30 бодови кој денеска многу полесно од очекуваното излезе на крај со Удинезе (3:0) за кој од почеток играше Илија Несторовски.
