Предводникот на Интер е, нормално, задоволен од победата над силната Барселона, која се надева ќе биде пресвртница по лошиот старт на сезоната во Серија А.
Многумина, меѓу кои и самите навивачи на Интер, не очекуваа дека „Нераѕурите“ не само што ќе ја победат Барселона, туку и нема да примат гол од нападот предводен од полската гол-машина, Роберт Левандовски. Минимални, но доволни 1:0 со победничкиот гол на Хакан Чалханолу постигнат во судиското надополнување од првиот дел.
„Не би рекол дека победата е неочекувана. Кажав претходно дека е одлична можност да се победи еден од најдобрите тимови во светот“, почна Симоне Инѕаги говорејќи за Sky Sport Italia.
„Игравме агресивно, одлучно, бидејќи тоа беше единствениот начин како да се победи ваков противник. Долчо чекавме за ова, среќен сум за навивачите и за клубот, но ние сѐ уште немаме ништо постигнато. Ова нека биде пресрасна ноќ која ќе означи почеток на нешто“.
Интер беше во криза по низата слаби резултати во Серија А, а последниот пораз дома од Рома на Жозе Мурињо се чинеше дека ја прели чашата.
„Бев многу, многу разочаран од резултатот против Рома, но не и од играта. Натпревари како овој ќе нѐ подобрат, сега треба да си ја обновиме силата и имаме можност да се повратиме во Серија А. Ова може да ни биде нов почеток, но мораме да покажеме чувство на конзистентност врз основа на овој резултат и оваа игра“, додаде.
Веќе некое време на Чизмата кружат гласини дека Инѕаги би можел да добие отказ, а таквите гласини продолжија и пред синоќешниот натпревар со тоа што многумина говореа дека негативен резултат против Барса ќе значи негова разделба со Интер.
„Продолжувам со мојата работа, се случуваат одредени моменти, но јас одам со високо подигната глава бидејќи мојот стручен штаб, играчите и клубот направија одлични работи во изминативе 15 месеци. Видов тим кој е солиден и кој се бори заеднички, во спротивно не може да се остварат резултати како овој. Задоволен сум, но ова се истите момци кои ми донесоа два трофеја пред неколку месеци и тие повеќе од било кој знаат дека сега можеме да се издигнеме“, заврши италијанскиот стратег кој со оваа победа ги поби сите шпекулации за негово заминување од Милано.