Вечерва сезоната ја продолжува и Лацио, главниот конкурент на Јуве за Скудетото и тоа на тешко гостување кај Аталанта.
Двата најнапаѓачки клубови во Калчото вечерва ќе ги вкрстат копјата во натпревар од исклучителна важност и за двата. Аталанта не смее да си дозволи пораз за да не ѝ дозволи на Рома да ѝ се доближи и да ѝ го загрози 4. место кое води во Лигата на шампионите. Од друга страна, Римјаните мораат да ги освојат трите бода за да го задржат чекорот со лидерот Јувентус во борбата за титулата.
За тоа и тоа како е свесен стратегот на гостите, Симоне Инѕаги, под чија палка Лацио игра одлично.
„Имаме огромна желба да продолжиме со играњето. Копа Италија покажа дека има потешкотии со збиениот распоред. Ќе се бориме со физички и ментален замор. Како и да е, го гледам тимот желен да се врати на терен. Тренираа добро и подготвени се да играат. Со Аталанта дефинитивно нема да играат Леива, Лулиќ, Марушиќ, Луис Фелипе, Адекање и Раул Моро“, вели тренерот на Лацио.
„Треба да продолжиме со истата глад за победа и тимскиот дух кој нѐ придружуваше во досегашните 26 кола. Бевме први кои престанаа да играат и последни кои продолжуваат. За нас сега почнува ново првенство, со 12 натпревари во 40 дена“.
Лацио со 60 постигнати голови на досегашните 26 кола е втор најефикасен тим, а прв е неговиот вечерашен противник. Аталанта со 74 голови е убедливо најефикасната екипа на Чизмата. Тоа ветува добар фудбал и голови вечерва. Во редовите на Лацио игра и најдобриот стрелец во Серија А, Чиро Имобиле со 27 голови.
„Веднаш играме со една екипа која веќе неколку години игра добро. Аталанта е организиран тим со одлични индивидуалци и голем тренер како Гасперини. Ќе биде навистина вистински тест“, заврши Инѕаги.