Најголемата машина во светот за апсорпција на јаглерод диоксид директно од воздух, лоцирана во Исланд, почна со работа вчера, соопшти компанијата Climeworks, која стои зад овој проект.
Проектот за развој на фабрика е резултат на заедничката работа на швајцарскиот старт-ап Climeworks AG, специјализиран за апсорпција на јаглерод диоксид директно од воздухот, и исландската компанија Carbfix за складирање на јаглерод.
Машината може да апсорбира до четири илјади тони CO₂ годишно, што е еднакво на количината што ја испуштаат околу 790 автомобили за една година. Минатата година, светските емисии на CO₂ изнесуваа 31,5 милијарди тони, покажуваат податоците на Меѓународната агенција за енергија (IEA).
Директната апсорпција од воздухот е една од неколкуте технологии за извлекување на јаглерод диоксид од атмосферата. Научниците велат дека овој метод е клучен за намалување на глобалното затоплување, за кое се смета дека е причина за топлотни бранови, пожари, поплави и зголемување на нивото на морето.
Фабриката, наречена Orca, што е исландски збор за енергија, се состои од осум големи резервоари, слични на оние што се користат за транспорт на стока. Резервоарите се опремени со високотехнолошки филтри и вентилатори за екстракција на јаглерод диоксид.
Изолираниот јаглерод потоа се меша со вода и се депонира длабоко под земја, каде што полека се претвора во карпа. Целосниот систем, кој вклучува екстракција и таложење, се напојува со обновливи извори на енергија, односно енергија од блиската геотермална електрана.
Директната апсорпција на CO₂ од воздухот е сѐ уште нова и скапа технологија, но експертите кои се занимаваат со ова се надеваат дека трошоците ќе се намалуваат со растот на бројот на компании и потрошувачи кои сакаат да го намалат својот јаглероден отпечаток.
Во моментов, постојат 15 активни постројки за директно вадење CO₂ од воздухот во светот, кои заедно, според IEA, апсорбираат повеќе од девет илјади тони јаглерод диоксид годишно.
Американската нафтена компанија Occidental во моментов ја развива најголемата фабрика за директно извлекување на милион тони јаглерод диоксид од воздухот годишно, во близина на неколку нафтени полиња во подрачјето на Тексас, во сопственост на компанијата.
Climeworks неодамна потпиша десетгодишен договор за купување на јаглерод диоксид со водечката швајцарска осигурителна компанија Swiss Re, а компанијата нуди и претплата услуга која им овозможува на потрошувачите да ги надоместат месечните трошоци за отстранување на јаглерод.