Фудбалерите на Ајнтрахт ја елиминираа Барселона во четвртфиналето од Лига Европа, а освен поразот од Каталонците, боли и тоа што на трибините на „Камп Ноу“ имаше околу 30.000 навивачи на германскиот клуб.
Тренерот на Барселона, Чави Ернандес, по поразот од 2:3 (или со вкупен резултат од 3:4 во два натпревара), истакна дека очекувал неговиот тим да има поддршка од 70.000 навивачи и најави истрага како се нашле толку многу гостински навивачи на стадионот.
Според правилата на УЕФА, на клубот од Франкфурт му биле дадени само 5.000 билети.
„Атмосферата не ни помогна. Впечатокот беше како да играме финале со поделени навивачи. Клубот проверува што се случило. Тоа беше грешка од наша страна“, рече Чави и продолжи:
„Го очекував 'Камп Ноу' со 70.000 навивачи на Барса, но не беше така“.
Сѐ поизвесно е дека Барселона втора сезона по ред ќе ја заврши без освоен трофеј, бидејќи во Примера има 12 бода помалку од водечкиот Реал Мадрид и сѐ уште нема обезбедено место меѓу првите четири. Барса е втора на табелата, но само 4 бода му бега на петтопласираниот Бетис.
„Би сакал да му честитам на Ајнтрахт бидејќи тие тоа го заслужуваат. Целта во остатокот од сезоната е да се пласираме во Лигата на шампионите“, додаде Чави.
Тимот од Франкфурт во полуфиналето ќе се сретне со Вест Хем.
Во знак на протест поради големиот број гостински симпатизери, каталонските навивачи ги оставија столчињата на стадионот на полувремето и се вратија 10-20 минути по почетокот на вториот дел.