Италијанскиот фудбалски сојуз донесе одлука да ја суспендира цела Серија Б лига откако три второлигаши банкротираа (Чезена, Бари, Авелино) и така првенството остана со само 19 клубови, што е помалку од бројката која ја предвидуваат правилата.
Серија Б веќе со години има 22 клуба секоја сезона, но по ваквата ситуација Сојузот мораше да дејствува и по итна постапка спроведе одлука новата сезона да се игра со 20 клуба.
И понатаму недостасуваше еден клуб за да се пополни минималната бројка, па Сојузот предложи во Серија Б вонредно да влезе еден третолигаш. Ова беше неколкупати одбиено од страна на раководството на Серија Ц бидејќи во тој момент се очекуваше втората лига ќе продолжи да се игра со 19 клубови.
Клубовите од трета лига како Сиена, Новара, Катанија, Тернана и Про Верчели поради ова се обединија со Синдикатот на фудбалери и со заедничка тужба побараа Серија Б да биде суспендирана отсега па додека не се донесе конечна одлука, а притоа најавија и штрајк од домашните натпреварувања.
Регионалниот италијански суд во Рим одлучи да го суспендира првенството додека националниот сојуз не донесе одлука за бројот на клубови кои ќе се натпреваруваат во претстојната сезона. Ново решение ќе се бара во петок, кога клубовите и Сојузот ќе разговараат детално за понатамошниот развој на ситуацијата.