Археолози во истиориски богатиот Израел пронашле древен чешел кој датира од пред околу 3700 години и на кој е испишана веројатно најстарата позната цела реченица.
Натписот испишан со канаанско писмо служел како потсетник за луѓето дека редовно треба да си ги чешлаат косата и брадата за да се ослободат од вошки. Реченицата содржи 17 букви кои велат:
„Нека овие запци ги искоренат вошките од косата и брадата“.
Експертите велат дека ова откритие фрла ново светло на некои од најраните начини на користење на канаанското писмо во човештвото, измислено околу 1800 година п.н.е. и темел на сите азбучни системи, како што се хебрејски, арапски, грчки, и конечно латиница и кирилица.
Ова покажува на тоа дека луѓето во тоа време имале проблем со вошки во секојдневниот живот, а археолозите велат дека пронашле дури и микроскопски докази од вошки на чешелот.
Овој чешел прв пат беше ископан во 2016 година во Тел Лахиш, археолошко наоѓалиште во централниот дел на Израел, но дури кон крајот на минатата година еден професор при израелскиот Хебрејски универзитет ги забележал ситните зборови испишани на него. Детали за пронајдокот излегоа денеска во списанието Jerusalem Journal of Archaeology.
Главниот истражувач, археологот Јосеф Гарфинкел од Хебрејскиот универзитет, за Associated Press изјави дека иако со текот на годините биле пронаоѓани многу артефакти со канаанско писмо, ова е прв пат да биде пронајдена цела реченица.
Фактот што реченицата е пронајдена на чешел од слонова коска во палата во храм во древен град, заедно со спомнувањето на брада, укажува на тоа дека само богатите луѓе знаеле да читаат и пишуваат.
„Тоа е многу 'човечки' текст. Ни покажува дека луѓето навистина не се имаат променето, ниту пак вошките се промениле“, вели Гарфинкел.
Канаанците зборувале на древен семитски јазик, сроден со денешните хебрејски, арапски и арамејски, и живееле на просторот кој го зафаќал крајбрежјетро на Источниот Медитеран. Се верува дека тие го развиле првото абецедно писмо.