Леталото SLIM направи неверојатно прецизно слетување на Месечината и покрај тоа што во последен момент имаше проблеми со моторот, соопшти денеска Јапонскиот центар за вселенски истражувања (JAXA) и ја објави првата фотографија од површината на Месечината. Фотографијата е направена од малиот робот Lunar Excursion Vehicle 2 (LEV-2), мини ровер не многу поголем од тениско топче (на сликата подолу) испуштен од лендерот при слетувањето.
На фотографијата гледаме жолт лендер, поставен под благ агол на сива карпеста површина, пишува AFP. Во петокот, вселенското летало Smart Lander for Investigating Moon (SLIM), со помош на прецизна технологија, слета на област која се протега само 100 метри. За споредба, зоната на слетување на американското вселенско летало Peregrine се протега на неколку километри.
„SLIM постигна успешно меко слетување. Потврдено е дека местото на слетување е на 55 метри од целниот центар“, соопшти денеска JAXA. Јапонската агенција по слетувањето на лендерот извести дека соларните панели не генерираат енергија, дека имаат проблеми со напојувањето и дека користат резервна батерија.
Три часа по слетувањето, JAXA одлучи да го исклучи SLIM, иако му останаа уште 12% енергија, за да може повторно да се разбуди во случај да се промени аголот под кој Сонцето грее на панелите.
„Можеби кога ќе се промени положбата на Сонцето, системот ќе се рестартира ако сончевата светлина ги наполни соларните ќелии. Ова може да биде за некои недела дена бидејќи фотоволтаичните панели на леталото се свртени кон запад“, објаснува JAXA.
BBC објави дека оваа прва слика од Месечината направена од мини роверот покажува дека SLIM се ротирал за 90 степени за време на слетувањето и всушност „слетал на својот нос“, што може да ги објасни проблемите со соларните панели кои не се правилно позиционирани кон сонцето.
„Проблемите со главниот мотор влијаеја на положбата на вселенското летало при слетувањето“, соопшти JAXA, но не прецизираше до кој степен е променета положбата на леталото.
„Докажавме дека можеме да слетаме каде сакаме, не само каде што мислиме дека можеме. Ова ќе охрабри повеќе луѓе, по можност јапонски мисии, да се обидат да слетаат вселенски летала на неистражени места на Месечината“, рече проектниот менаџер Шиничиро Сакаи.
Поради својата навалена положба, сончевите панели на SLIM не беа во можност да генерираат енергија, но промената во насоката на сончевата светлина може да ги разбуди пред да удри големиот студен бран на 1 февруари. „SLIM не беше дизајниран да преживее месечева ноќ“, рече Сакаи.
JAXA верува дека оваа технологија за слетување ќе стане моќна алатка за идно истражување на ридските месечеви полови, за кои се верува дека се потенцијален извор на кислород, гориво и вода, суштински фактори за поддршка на животот.
SLIM ќе ја проучува површината јужно од Морето на тишината за краток временски период. Неговата цел е локација во близина на мал ударен кратер во рамнината позната како Море на нектарот, за која се верува дека е формирана од древна вулканска активност. Таму ќе го истражуваат составот на карпите, што би можело да помогне во подобро разбирање на формирањето и развојот на Месечината.
До денес, само четири земји успеале да слетаат вселенско летало на Месечината: САД, СССР, Кина и Индија. JAXA планира да го испрати својот астронаут на Месечината во следните неколку години како дел од програмата Artemis на НАСА.