По поразот на Јапонија од Хрватска во Катар, селекторот на јапонската репрезентација Хаџиме Моријасу им се поклони на навивачите кои патуваа долг пат за да ја бодрат репрезентацијата.
Јапонците изгубија од Хрватска на пенали, но селекторот верува дека претстојат подобри времиња за фудбалот во земјата на изгрејсонцето.
Хрватска победи со резултат од 3:1 во пенали, а Јапонија, и покрај големиот напор, остана без пласман во четвртфиналето.
Во стилот на традицијата, Јапонците достоинствено се простија од мундијалските настапи во Катар.
„Не потклекнавме на притисокот. Храбри беа играчите кои одиграа 120 минути и ги изведуваа пеналите. Би сакал да им честитам на нивниот труд. Играа под неверојатен притисок. Секако дека сакавме да победиме и резултатот е несреќен за нас, но тоа не го негира трудот на играчите. Не можевме да ја поминеме пречката за четвртфиналето, но играчите покажаа нова генерација на јапонскиот фудбал“, изјави тренерот Моријасу.
„Ги победивме Германците и Шпанците, а тие се светски шампиони. Треба да веруваме во нашите способности и да ни биде цел не само да го повториме ова, туку и да бидеме подобри. Иднината на јапонскиот фудбал ќе биде поинаква“, верува јапонскиот селектор.