Во организација на глобалното движење „100 Thousand Poets for Change“, во соработка со здружението „Контекст – Струмица“ денеска во Струмица ќе се одржи десеттото издание на поетската манифестација „100 Илјади поети за промена“.
По претходно распишаните конкурси за поезија и плакат, за ова јубилејно 10-то издание програмата ќе се реализира на две локации. Во „Babylon Cafe“ со почеток во 20 часот ќе биде отворен фестивалот со промоција на зборникот „100 Илјади поети за промена“ во кој се застапени 60 поети, дел од повеќе од 200 авторите кои се пријавија на конкурсот. Ќе има и поетско читање на поети од градот како и поети гости од цела Македонија.
Годинава, поради пандемијата, на поетското претставување ќе учествуваат само поети од Македонија, меѓу кои Љулзим Хазири, Ива Дамјановски, Зоран Анчевски, Никола Маџиров, Сузана Мицева, Андреј Ал-Асади, Исток Улчар, Вања Изова Велева и многу други, со музичка поддршка на Панче Илиев (Pi).
Во вториот дел од програмата кој е предвиден да започне во 22 часот во кафе бар „наГоре“, ќе биде отворена изложбата на плакати, односно дизајнерските решенија кои пристигнаа на конкурсот, а учесниците и гостите ќе ја имаат уникатната можност да го проследат музичко-визуелниот перформанс на колективот „Improof“.
Настанот е дел од глобалната манифестација „100 Thousand Poets for Change“, меѓународна манифестација која годинава се оддржува во повеќе од 15 држави во светот, со десетици закажани виртуелни и offline настани, а нашата држава и Струмица се дел од ова движење уште од самиот почеток.
Организаторите наведуваат дека за време на фестивалот ќе бидат запазени сите протоколи за заштита од COVID-19 според мерките на СЗО и Министерството за здравство.