Манчестер Јунајтед соопшти дека германскиот стратег Ралф Рангник ќе го води тимот до крајот на оваа сезона.
Крај на сите шпекулации околу новиот тренер на Манчестер Јунајтед, барем до јуни. Германецот и англискиот клуб постигнаа договор тој да го води тимот како привремено решение, но потоа да остане уште две години во клубот како консултант.
„Ралф е еден од најценетите тренери и иноватори во европскиот фудбал. Тој беше наш кандидат број еден за улогата на привремен тренер, со оглед на неговото непроценливо лидерство и технички квалитети тој ќе ни донесе речиси четиридецениско искуство во менаџирањето и тренирањето. Сите во клубот едвај чекаат да работат со него за време на сезонава, а потоа и во наредните две години во улога на консултант“, рече клупскиот директор Џон Мартоу.
Германскиот стратег не го криеше задоволството што првпат ќе води екипа надвор од својата татковина и тоа во великан како клубот од „Олд Трафорд“.
„Возбуден сум што доаѓам во Манчестер Јунајтед и се фокусирам сезонава да ја направам успешна. Тимот изобилува со талент и има одличен баланс на младост и искуство. Сите мои напори за наредните шест месеци ќе бидат на тоа да им помогнам на овие играчи да го достигнат својот потенцијал, како индивидуално, така и како тим, што е и најважно“, изјави Рангник.
Мајкл Карик, кој ја имаше улогата на вршител на должноста ќе остане на клупата на Јунајтед додека работната виза на Рангник се финализира.
„Клубот сака да му се заблагодари на московски Локомотив за нивната соработна во процесот на доаѓањето на Ралф во Манчестер Јунајтед“, нагласи клубот со оглед на тоа што Германецот од почетокот на летото беше кај Локомотив во улога на менаџер за спорт и развој.
За 63-годишниот Рангник ова е прв тренерски предизвик надвор од својата татковина каде има водено клубови како Лајпциг, Шалке 04, Хофенхајм, Ханофер, Штутгарт, Улм, Ројтлинген и други помали.
