Најголемото италијанско дерби и веројатно одлучувачка пресметка за титулата дефинитивно ќе се игра пред морничава атмосфера поради безбедносните мерки за ширењето на корона вирусот.
Како што се најавуваше, се оствари најлошото сценарио. Голем натпревар како Дерби д'Италија ќе се игра без присуство на публика. Премиерот Џузепе Конте уште од минатото коло воведе забрана прво на одржување спортски натпревари, а потоа донесе одлука да може да се одржуваат, но пред празни трибини.
Имаше натегања дека можеби исклучок ќе биде направен за големото дерби во Торино кое в недела вечер ќе го одиграат првопласираниот Јувентус и третопласираниот Интер. Сепак, и покрај огромното значење на натпреварот, алармантната ситуација со ширењето на корона вирусот во Италија си го направи своето.
Играњето зад затворени врати не е само удар за оние кои купиле карта и сакаа да го збогатат овој спектакл, туку и за оние кои на малите екрани ќе бидат сведоци на театарска атмосфера, како и за фудбалерите кои ќе бидат најпогодени бидејќи никој не сака да игра без публика, особено не вакво дерби.
Интер веќе одигра еднаш на таква морничава атмосфера. Синоќа во Лига Европа го пречека Лудогорец, а натпреварот личеше како да е некој тренинг натпревар слушајќи се ехо од тренерите и нивните помошници како довикуваат до играчите.
Огорченоста на навивачите е зголемена и поради фактот што Јувентус не сака да им ги врати парите на навивачите кои ем си купиле карта, ем им е забрането да присуствуваат на натпреварот. За разлика од „Бјанконерите“, Интер во целост им ги врати парите на навивачите за синоќешниот натпревар. Од таборот на Јуве најавија дека размислуваат како да им се оддолжат на навивачите, меѓутоа не и со враќање на парите.
Покрај големото дерби, без публика ќе се играат и натпреварите: Удинезе - Фиорентина, Милан - Џеноа, Парма - СПАЛ и Сасуоло - Бреша. На останатите ќе биде дозволено присуство на навивачи.
Официјално соопштение за натпревари без публика во PDF формат.
Правила за присуство на лица на натпреварите без публика во PDF формат.
