Фудбал

Јувентус ја одби понудата на Челзи за Игуаин, инсистира да го продаде Аргентинецот

14. јануари 2019 - 15:42 | К.З.

Аргентинскиот напаѓач Гонзало Игуаин му даде до знаење на неговиот актуелен клуб Милан дека сака му се приклучи на неговиот поранешен тренер Маурицио Сари во Лондон. Јувентус и Милан во наредните неколку дена ќе разговараат околу раскинување на неговата позајмица, бидејќи Игуаин со сигурност не е среќен во Милано.

Челзи веќе го контактираше Јувентус околу потенцијална позајмица, но италијанскиот шампион инсистира дека не сака да го позајму играчот, туку наместо тоа сака да го продаде.

Милан веќе ја започна потрагата за нов напаѓач, откако Гонзало Игуаин му соопшти на раководството дека очекува да си замине од Милано веќе овој месец. Во моментов двата италијански клуба се наоѓаат во Саудиска Арабија, каде ќе се одигра италијанскиот Суперкуп.

Засега Леонардо и Паоло Малдини го идентификуваа Криштоф Пјонтек како замена на Аргентинецот, но одлуката за иднината на Игуаин сепак стои во рацете на Јувентус, бидејќи тоа и понатаму е клубот со кој тој има постоечки договор.

Челзи, пак, се обидува да го замени Алваро Мората со Гонзало Игуаин бидејќи Шпанецот не импресионира со голгетерските способности откако пристигна на Стемфорд Бриџ. Тој преферира да се врати во Ла Лига, каде што тимот на Севиља е силно заинтересиран за неговите услуги, но постои интерес и од Атлетико Мадрид и Барселона. Сепак, раководството на Челзи напомена дека Мората нема да замине во случај да не успеат да обезбедат замена за него.

Најголемиот проблем во целата ситуација го има Милан, кој во составот има само двајцата напаѓачи: Гонзало Игуаин и Патрик Кутроне. Поради Финансискиот фер плеј, Милан не може да троши големи суми во јануарскиот преоден рок, што значи дека останувањето на Игуаин би можело да биде единствената опција за италијанскиот клуб.

Разврска на трансфер-сагата се очекува во наредните неколку дена, откако Милан и Јувентус ќе го одиграат натпреварот од Суперкупот на Италија.

Коментирај