Дали сте знаете дека во светов постои држава која користи знаме нацртано од син на претседател? Згора на тоа, цртежот потоа во знаме го претворила првата дама на истата држава, односно мајката на синот на претседателот.
Средноамериканската држава Панама е уникатна по многу работи, а една од нив е и нејзиното знаме.
Откако Панама била на работ да избори независнот од Колумбија во 1903 година, на новата држава ѝ било потребно знаме. Во знак на благодарност кон САД поради поддршката не само за независноста, туку и за изградбата на Панамскиот канал, првичниот предлог бил знамето на Панама да биде како она на САД, со 7 црвени ленти и 6 жолти (наместо белите на САД), додека во горниот лев агол наместо бели ѕвезди на сина позадина да има две поврзани сонца кои ја претставувале Северна и Јужна Америка, со Панама како мост помеѓу нив. Меѓутоа, ова знаме лично го одбил тогашниот претседател на Панама, Мануел Амадор Гереро.
На 1 ноември истата година синот на претседателот, Мануел Енкарнасион Амадор, кој важел за вешт уметник, нацртал негов предлог-знаме со 4 правоаголници од кои два бели и по еден син и црвен, а во белите кај едниот сина ѕвезда, додека кај другиот црвена.
Цртежот ѝ го покажал на мајка му, Мариа де ла Оса де Амадор, која потоа успеала со помош на блиски роднини да направи три копии на новото предлог-знаме и притоа успешно да ја избегне потерата од колумбиската армија. Сите три копии по независноста на 3 ноември биле успешно однесени во главниот град Панама Сити по што почнало масовно производство на панамското знаме.
Сепшак, ова знаме потоа претрпело мала промена. Бидејќи веднаш по независноста сината боја станала препознатлива за една од најголемите политички партии во државата, била направена промена на редоследот на правоаголниците, па така горниот лев правоаголник, кој во оригиналната верзија бил син, станал бел. Воедно, за сината боја била употребена потемна верзија. Почнало да се користи на 20 декември 1903, а официјално било ратификувано со закон наредната 1904 година.
Токму оваа верзија до ден денес се користи како официјално знаме на Панама.
